但最近为左一班 Friend掕Friend 识嘅日本新朋友，

我竟然喺一个月内两次牺牲最爱嘅瞓觉时间，

6点几眼屎都未抺乾净就出发参加两次活动，

而且两次都係我喺香港十世都唔会去一次嘅BBQ！

点解我要咁虐待自己？

因为有啲野，真係试左一次，就有第二次⋯⋯

两次嘅目的地係离东京市中心约两个钟车程嘅神奈川县，

第一次係有无敌海景嘅「观音崎公园」烧烤场，

今次係一个叫「清川村」嘅地方，

起初以为都係海边烧烤，点知今次深入山涧，

来一个「川烧」♡

沿着河川嘅石路就喺我地嘅烧烤场，

背靠绿树，放眼群山，加上潺潺流水BGM，

吸一口极上清新空气，本来晕车浪都即刻好返晒！

唔似香港用烧烤叉，日本人惯用网烧，

通常啲男人都会劲Gentleman咁负责烧晒。

起好个炉就係呢位「河户君」大显身手嘅时候，

佢喺肉店返工，係一个专业「腌肉师」，

两次BBQ嘅靓肉都係由佢一手包办，

肥美猪肉、高级和牛、自家製免治鸡扒⋯⋯

专人煮理嘅炭火烧肉，啖啖脂香肉嫩兼极度Juicy，

我呢只食肉兽梗係一旧接一旧欲罢不能，

再大啖大啖

啤酒灌入喉咙，

狂擦边豪饮吹吹水，真係人生一大乐事！

一轮烤肉混战后，

仲要攞燻製烟肉滴出嘅油来炒麵埋斋，

问你死未！

饮饱食醉，有人就攞个天然冰镇西瓜出黎,

未食得住～

因为要用来玩日本人嘅例牌压轴游戏： 擘西瓜！

睇日剧以为好易，但转左几圈真係唔知边忽东南西北⋯⋯

结果轮流玩晒都无人中，

最后又搵河户君出马KO佢！

虽然旧西瓜唔算特别甜，

但就食到一种懒青春嘅味道。

又食又玩大半日，

离走时夹返钱，计埋场地费每人200几蚊，

真係捱下眼瞓又点话〜